Arnanut

– Inuiaqatigiit akornanni inuit amerlanersaasa imminnut iluaralutik inuulernissaannut suleqatarusuppunga, 37-nik ukiulik Nauja Brøns Nuummi najugalik oqarpoq.

– Isumarpunga iluarisanik atisaqarneq nuannarisamillu angerlarsimaffeqarneq aamma naqisimaneqarnani isummanik saqqummiisinnaaneq inunnut tamanut sunniuteqarluartartoq. Imminut iluarisi - maarsinnaalersarpugut ilutsinni eqqarsaatigut avammullu kiinnertarnerput imminnut naleqqukkaangata, Nauja oqarpoq.

Nauja januar 2008 tikillugu Royal Arctic Line-mi marketingmedarbejderitut sulivoq. Massakkullu namminersortutut suliffiutini »Your Style« ammaqqammerpaa. Tassanilu siunnersueriaaseq coaching atorlugu inuit pisariaqartitsisut siunnersortarpai soorlu qanoq ittunik atisaqartariaqarnerinik aamma angerlarsimaffiisa suliffiisaluunniit qanoq aaqqissorneqarnissaannik.
– Tamakkununnga tunngasut ukiorpassuarni soqutigisaraakka, tassa pitsaaqutigut aamma kusanaqutigut iluaqutitut qanoq atorsinnaanerigut pitsaanerpaamillu iluaqutigisinnaanerigut – pingaartumik atisat angerlassimaffimmilu aaqqissuussisarnerit eqqarsaatigalugit. Inuuninni misilittakkakka aamma ilinniarninni pissarsiakka kiisalu inoqatinnik siunnersuinermik nunnarisaqarnera ataatsimoortillugit Coach-itut ilinniarninni iluaqutigisinnaanngorpakka.

Nuannernerpaavorlu qangali pilerigalugu takorloortagara piviusunngortissinnaalerakku, tassa namminersortutut sulineq. Taamaasillunga kissaatiginerpaasara pileriginerpaasaralu malillugit inuulerpunga.

Nauja Brøns 1990-imi allaffimmiutut ilinniarluni naammassivoq, kingornalu 1999- imi beklædningsformgiveritut Odense Håndarbejdsseminarium-imi naammassilluni. Beklædningsformgiver tassaavoq inuit ataasiakkaat ilusaat malillugit atisanik ilisserillunilu mersortartoq.

Siornalu maajimi ilinniarfimmi iPotentialimi coach-itut ilinniarluni aallartippoq januarimilu naammassilluni.
– Inuunera sumut atussanerlugu tassani ilinniarninni erseqqinnerusumik paasivara – tassa uanga iluarinerusannik qanoq inoorusunnerlunga. Imminut upperinerulerpunga nutaamillu misiliinissamut qunujunnaarlunga, Nauja oqarpoq nangillunilu:
– Inuttut qaffatsikkusukkaanni nujaleritinnerinnaq imaluunniit nutaanik atisartaarnerinnaq iluaqutaasanngilaq. Itinerusumik qanoq iliuuseqartariaqarputit nutaamik alloriarnerit ilumut ilinniit aallaaveqartutut misigissagukku.

Nauja Brøns ima assersuusiorpoq.
– »Arnaq nutaaq«-ngortut amerlanersaat pissusitoqqaminnut utertarput inuk iternga tikillugu sammineqarsimanngimmat. Piffissaq sivisunngitsoq qaangiukkangat atisaat qangatut ileqqittarput. Atisalersortarnerpummi ilutsinni qanoq immitsinnut isiginitsinnit aallaaveqarpoq, tassungalu qilersorsimasutut ittarpugut nutarterinissarpullu qunugisarlugu. Taamaattumik ilorlikkut eqqarsartarnitta isikkuttalu ataqatigiinnissaat pingaaruteqarpoq.
– Inuppassuusugut ajortut avaanngunartullu soqutisaqarnerusarpugut, soorunalumi inuit taamaattut aamma imminnut naammaginatik inuusarput, Nauja Brøns oqarpoq.
– Immitsinnut iluarinerugutta aamma tamanna inoqatitsinnut ingerlateqqittarparput, tassa inoqatigut nuannersumik sunnertarpagut, Nauja isumaqarpoq.

QINNGORNEQARNEQ
Saaffiginnittartut qanoq ikiorsinnaavigit?
– Inuit qamuuna qanorpiaq tunngaveqarnerminnik paasinnissinaalernissaannik ikiorsinnaavakka. Tamannami paasigaangamikku inuttut qinngornerat erseqqinnerulersarpoq, tamannalu atisatigut angerlarsimaffimminnilu qanoq aaqqissuussinikkut aamma nutaamik inooriaaseqalernikkut takuneqarsinnaalersarpoq.

– Soorlu atisanut tunngasut pillugit saaffigineqaraangama aallaqqaataani paasiniaallunga oqaloqatigisarpara atisaasivia takusaqqaarnagu. Oqaloqatigisama akissutaasa ersersittarpaat saaffiginnittoq sunik soqutigisaqartuunersoq. Akissutai aallaavigalugit atisai misissoriarlugit immikkoortitersinnaavakka ilai piiarlugit sinnerisalu qanoq atorneqarsinnaanerinik ilinniartillugu. Taava kingorna angerlaraangama allattuisarpunga. Saaffiginnittup kissaatigisavini ilumut piviusunngortissagunigit qanoq iliortariaqarnera aamma suut pinaveersaartassagai allattortarpakka. Taava siunissami atisarsinialeraangami allattukkat taakku tunngavigissavai, taamaasiornikkullu pileritsaassineq tunngavigiinnarlugu pisisarnerit pinaveersaartinneqarsinnaapput.
– Suliffiup qanoq aaqqissuunneqarnera pillugu sulissutara siulleq tassa Mette Steenholdt-ip suliffiutaa: iPotential coachingbureau. Taamanikkut Mette ininik soqutiginartunik pissarseqqammerpoq soqutigisaalu malillugit init soqutiginartut aaqqissuuppagut, inillu taakku isertunit nuannarineqartaqaat.
– Saaffiginnittut uanga isumannik sunnerniannginnissaat pingaarnerpaatippara. Suleqatigiinneq pingaarnerpaavoq. Inuit
saaffiginnittut ilorpiaminni sunik kissaateqarnerminnik
- kisianni matuuginnarsimagamikkit puigorsimasaannik - paasinnilernissaat pingaarnersaavoq.

STYLECOACHING – SUNAANA?
Stylecoaching oqaaseq taanna ungasinngitsukkut aatsaat atorneqalerpoq, tassaniippullu tuluit oqaasii marluk ataatsimoortitat: »styling« aamma »coaching«. Imminut qanoq isiginerput pillugu eqqarsaatigut ileqquliutiinnakkagullu periuseq Coaching iluaqutigalugu paasiniarneqarsinnaapput.

Taamaattumik allanngorusukkutta inuup allap isaanit immitsinnut isigisutut iliornissarput pingaaruteqarluinnarpoq.

Nauja Brøns aamma stylecoaching pillugu annertunerusumik paasisaqarusukkuit una alakkarsinnaavat: www.style.gl

All. Irene Jeppson
Assiliisoq Leiff Josefsen

– Suliffiga nuannareqaara, nutaaliorsinnaatitaavunga, inuppassuit naapittarpakka suliakkalu assigiinngiiaartuullutik.

Anita Søndergaard Pedersen meeqqat atuarfianni 11. klassemiit naammassigami Samsø efterskolemi atuaqqaarpoq. Tamatumalu kingorna Nuummi ilinniarnertuunngorniat ilinniarfianni atuarluni.
– Ilinniarnertuunngoreerama sulinermik misileraavunga. Ilinniarnertuutut atuarnerma nalaani tagiartuisartunngorniarlunga aalajangerpunga Århusimilu taamatut ilinnialerlunga.
– Ilinniartuuninnili semesterit pingajuat aallartikkaluarlugulu taamaatiinnarniarlunga aalajangerpunga, uannut naleqqunnerusumik ilinniarusullunga.

Anita Søndergaard Pedersen kammalaatiminit marlunnit pilerisaarneqarami Illuliornermi konstruktøritut ilinnialerpoq.

Illuliornermi konstruktørinngorniat sanaartornermut tunngasut ilinniartarpaat, sanaartornerup aallartinneraniit naammassinerata tungaasut qanoq pisoqartarnersoq ilikkartarlugu. Taamatut ilinniarneq ukiut 3 ½-nik sivisussuseqarpoq.
– Meeraallungalimi tamanna eqqarsaatigisimannguatsiarpara. Taamanimi meeqqat atuarfianniitillunga suliffinnik misiliigatta illuliornermik titartaasartut suliffianni sulivunga.

Uangami kisitsisinut tunngasut oqaasilerinermut tunngasuniit nuannarineruakka. Isumaqarpungalu illuliornermi konstruktøritut ilinniarneq arkitektitut aamma ingeniøritut iliniarnerit akornanniittoq.
– Ataataga sanasuuvoq, meeraagallaramalu aammami massakkut ataatama anaana uangalu sulinngiffeqarnitsinni suliffimminukaattarpaatigut, Anita Søndergaard Pedersen qungujulluni oqarpoq.
– Naluara tamanna sutut ilinniarnissannut aalajangeeqataasimanersoq.

Anita Søndergaard Pedersen december 2007-imi Odense Byggetekniske Højskolemi bygningskonstruktøritut naammassivoq ingerlaannarlu Nuummut suliartorluni uterluni.
– Suliffissannik arlalinnik neqeroorfigineqarpunga qinerparalu ingeniørit siunnersuisuisartut suliffiutaat INUPLAN A/S.

Soorlu suut suliarisarpigit?
– Illuliassanik titartaasarpunga, sananeqarnerinut tunngasut suliarisarpakka, U-værdier aamma kiassarneqarneranut tunngasut naatsorsortarpakka ilaallu ilanngullugit. Sanatitsisunut siunnersuisuuvunga, immersugassallu assigiinngitsut immersortarlugit aamma ilaanni sanaartorfiit ornittarpakka suliat qanoq ingerlaneri takusarlugit.
– Inatsisit sanaartornermut tunngasut malinneqarnerinik nakkutilleeqataasarpunga.

Illuliornermi konstruktøri makkunani sulisinnaavoq:
Illunik titartaasartuni, siunnersuisartutut ingeniørit suliffiutaanni aamma tassaasarput sanaartornermut titartakkat suliallu ingerlanneqarnissaanut pilersaarusiat najoqqutaralugit naatsorneqartariaqartunik naatsorsuineq.

Illuliornermi konstruktøri aamma illuliassap qanoq akeqarnissaanut tunngasunik naatsorsuisinnaavoq sanasunullu pisortaasinnaalluni.
– Angajoqqaama ingammik ataatama taamatut ilinniarsimanera tanngassimaarutigeqaat. Kisianni suleqatiginissara ataatama kissaatiginngilaa. Suleqatigissagukkumi ataatannut pisortaasussaavunga, Anita Søndergaard Pedersen illarluni oqarpoq.
– Sanaartornermik suliallit sakkortuunik oqaaseqartartuupput, tamannalu uanga ajornartorsiutiginngilara. Akiumagaanni akisoqarsinnaavoq aamma tusaanngitsuusaarneqarsinnaapput.
– Uanga suli nuanniitsunik tusaatinneqarsimanngilanga. Isumaqarpunga kalaallit sulisartut kalaallisut oqalussinnaanera nuannaarutiginerugaat sutut ilinniarsimanera eqqarsaatigivallaarnagu.
– Suleqatikka amerlanertigut perorsarsimasutut uannut saaffiginnittarput aamma arnaanera pillugu assigiinngitsumik pineqanngilanga. Suliassanut tunngasut pillugit arnaanera eqqarsaatigineqarneq ajorpoq, immaqa aallarterlaajunera kisimi.
– Anguterpassuit akornanni kisima arnartaavunga, taamaattorli arnatut misiginera allanngunngilaq. Suliffitsinni arnatut atisaqartarpunga, sanaartorfinnukassagaangamali soorunami suliffinnut naleqquttunik aamma malittarisassat malillugit isumannaatsunik atisaqartariaqarpunga, isumannaatsunik nasaqarlungalu kamippaqartarpunga.
– Imaanngilaq niviarsiaq nukappiarpalaartuusunga, taamaallaat meeraagallarama naatsunik nujaqarnikuuvunga, illarluni oqarpoq

Anitap angutaataa Ib Falck-Petersen timmisartortartuuvoq.
– Anguterpassuit akornanni arnartuaallunga sulisarnera angutaatima ajorinngilluinnarpaa. Isumaqarpoq sumiluunniit suligaluaruma nuannarigukku ajunngitsoq, Anita Søndergaard Pedersen oqarpoq.

All. Irene Jeppson

Inissiaqarfinni nakkutilliisut suliatik pillugit oqaluuttut tusaallugit tamakkuninnga ilinniarsimasuunani paasiuminaattarput. Ukuli arnat Anso, Kristine aamma Margrethe tamakkuninnga paasisimasaqartuugamik paatsuunnguassanngillat.

Tamarmillu isumaqatigiipput amerlanertigut suliassat taamaattut angutinit suliarineqartaraluartut aamma arnanit suliarneqarluarsinnaasut.
– Arnat atuisartut saaffiginnissutaannut tusarnaallaqqinnerusarput aamma kiffartuussillaqqinnerusarput. Angutimmi imatorsuaq nassuiaaneq ajorput, Kristine oqarpoq nangillunilu:
– Atuisunik naammagittaalliortoqaraangat angutit ingasattumik neriorsuilersarput. Uagulli arnat suut neqeroorutigisinnaanerlugit ilisimanerusarpagut.

Aamma arnat angutillu suleriaasaat assigiinngissuseqarput:
– Arnat sulianik arlalinnik ataatsikkut ingerlassaqarsinnaanermut pikkorinnerupput, angutilli suliaq ingerlatartik naammasseqaarlugu aatsaat tullia aallartikkusuttarpaat!

Kristine oqaluttuarpoq kingullermik taartaalluni Maniitsumiikkami namminneq sianiginngisaminik sunaaffa suleqatini tupigusutsissimallugit:
– Inissianik attartortut 30-it naliliiffiginissaat allaffimmi qarasaasiarlunga ulapputigileruttorikka sulisut ilaat iserpoq.

Oqaaseqarani matup saniani qeqaannarpoq sunaaffa allakkunnaarnissara utaqqigaa.

Allaatigalunga oqarfigaara »takanna oqalunniarit«. Tassami allaatigalunga oqaluttumik tusarnaarluarsinnaavunga. Sunaaffa tamanna sungiusimanngikkaa angutinngooq taamaanneq ajormata.

Inissiaqarfinni nakkutilliisutut sulineq ulapaarnartuuvoq. Mobile sianertuartoq, ineqartut, sulisartut kommunemilu sulisut tamarmik assigiinngitsunik saaffiginnissuteqarlutik allaffimmukartuartarput. Ataatsikkoortoqartillugu angutit malinnaasinnaajunnaartarnerat nalinginnaavoq, arnalli tamanna ajornartorsiutigivallaartanngilaat, tulleriiaarlugit oqaloqatigilluarsinnaavaat.

ATAQQINEQARUSUKKUT SULLISSILLUARTARIAQARPUTIT
Paamiuni inissiaqarfimmi nakkutilliisutut sulileqqaarnini Margrethep eqqaamalluarnerarpaa. Arnaalluni angutit suliffigisartagaannik sulileqqaarneq imaannaanngissinnaavoq.
– Aallaqqaataani sulisartunit ataqqineqassagaanni angutit suliarisartagaasa marloriaataannnik annertussusilimmik sulinissaq pisariaqarpoq. Ilaanni quianaattaqaat nikassarpalullutik oqartaramik »tamakkumi arnat naluaat«. Taamaasiortoqaraangat eqqarsartarpunga »Utaqqilaaritsi pisinnaasaqarnera takussavarsi«. Takutittarparalu!

Qujanartumillu Margrethep malugaa arnaq qanoq pisinnaasaqartigisoq takugaangamikku nalimittut isigilerlugullu ataqqilersaraat.

Ulapaarnerup nalaani uisakajaarnani sulisinnaaneq malugigaangamikku suleqatit tamarmik piuminarnerulersarput.

Margrethep misigisani nuannersoq oqaluttuaraa, taamanigooq kommunimi aqqusinerni sulisut formandiat arnat angutitulli sulisinnaanerannik paasinnimmat. Taannaana Margrethe aallarteqqaarmat arnanik nikassaasut ingasannersarisimagaat, allamilligooq suliffittaalermat ugguarnersaavoq.

Margrethe oqarpoq eqqortumik oqassaguni angutit suliffigisartagaannik arnaalluni suliaqalerneq oqitsuinnaanngitsoq. Ilaannigooq atugarliornartarpoq.

– Qujanartumik inuunerma ilaa Pituffimmi sulinikuugama angutit nikassaasinnaanerinut manngertinnikuuvunga. Nakkaannangitsummi nukittuunngortarput! Pituffimmi tamanna ilikkarsimanngikkaluarukku qaangali asoorsimassagaluarpunga. Taavaniittummi ila ingasat. Tassa angutit silarsuaat killeqanngitsoq.

Imaanngilaq arnanut ajorinnittuusut, arnanilli suleqateqarneq sungiusimanngiinnarpaat. Qulliuniarnersuartik takutissallugu nuannaraat, arnallu arnaanerat piinnarlugu malersuisarput.

Anso akuliuteriasaarpoq:
– Angutit tamarmik taamaanngillat, taamak oqarmat Kristine aamma Margrethe isumaqataapput. Angutit ataasiakkaat taamaattuupput, amerlanersaalli inussiarnersuullutillu ikiuukkumatuujupput. Ajoraluartumilli uagut taamakku ajortut eqqaamanerusaratsigit.

ARNAQ SAAMASOQ SUKANGASSINNAASOOQ
Inissiaqarfinni nakkutilliisoq anguterpaluttunik ipertuunik atallaalerluni sulisariaqanngilaq.

Anso arnarpalulluinnartunik atisaqarluni suliartortarpoq pinnersaaserluni kiinnilu tanissimallugu.
– Angutit ikiuukkumatoorujussuusarput anguterpaat akornanni arnartatuaq susinnaanngitsutut isigisasaramikku, Anso oqarpoq.

Angutilligooq aalajangersimasut ingalassimaniarpai:
– Tassaapput arnerituut isumaqartut arnat tamarmik pilerigigaatsik. Taamaattut ingerlaannaq malugisarpakka. Suleqatigissariaqarukkillu imminut pallitsaaliortarpunga.

Arnat taakku tamamarmik viceværtinit uingiarsorfigitittarneq misigisarsimavaat, ilaannilu tusaatillugit isikkuisa qanoq inneri oqaluuserineqartarsimapput. Taamaasiorfigitikkaangamik angutit pissusilersornerisullu akisarpaat. Taamaattumimmi suliffeqaraanni akisinnaaneq ilikkartariaqarpoq. Margrete oqarpoq arlaleriarluni arneriniarfigitittarsimalluni.
– Taamaasioriaraluartut toqqarlugit oqaluffigisarpakka.

Toqqartaarfigineqaraangamik paatsiveeruttarput. Toqqartaarineq ilikkarnikooqaara!

Nalunngilara eqqarsartartut: Ila una arnaq ingasak oqaasipiluttartoq. Toqqartaarfigitinneq saperpaat.

PISORTAQ MISIGISSUSILIK
Nakkutilliisut inissiaqarfinni sulisunut allanut pisortaapput. Ansop, Margrethep aamma Kristinep pisortaanertik nalunngilluarpaat.

Anso isumaqarpoq suleqatini pisortaaffigisani namminnersorsinnaasariaqartut, soorlu suliaminnut tunngasut pillugit apeqqutissaqalerunik nammineerlutik akissutissanik ujarleqqaartariaqarput.
– Piaaralunga sianiippasissunik aperigaangama namminneq akissutissarsisarput. Inuit ilinniartissinnaanngilagut, kisianni nammineq eqqarsarsinnaalersissinnaavagut, Anso oqarpoq.

Arnat angutiniit inoqatiminnik tusarnaallaqqinnerunerat Kristinep pingaartippaa.
– Misigissutsit tamatumunnga attuumassuteqarput. Inoqatit qanilaarluta oqaloqatigisinnaagatsigit pisortatut iluarisarpaatigut.

Suliffimmut tunngasuinaanngitsunik inuunermili aqqusaartakkat suulluunniit pillugit oqaloqatigiissinnaavugut. Ajornartorsiutaat tusarnaartarpagut – sulisullu pissutsit taamaattut iluaralugit maluginiartarpaat.

Saqqummiussaat tamarmik akineqartariaqanngillat – tusarnaarsinnaaneq iluaqutaanerusarpoq.

Taamaasioraanni ataqqeqatigiittut misigissuseqarneq takkuttarpoq, tamannalu nuannertaqaaq.

Pisortarli pisariaqartillugu sulisunut sukangasuuliorluni inissiisariaqartarpoq – tamanna pinngitsoorneqarsinnaanngilaq.

Kisianni pisariaqalersillugu sukangasuumik pissuseqarsinnaavunga, Anso qungujulluni oqarpoq. Taamaattariaqartillunga saamarpalunngivillunga arnaqquassaanngortarpunga.

Allatut ajornaqaaq saamajuaannartoqarsinnaanngilaq.

Margrethe arlaanni misigisutsiminit tiguartittuungajassimavoq:
– Ullut arlaanni anisitaasimasut utaqqiisaasumik ineqarfianni sarfaq qamittariaqalerparput.

Taamaasisoqartillugu misigissutsikkut assut atortittarpunga. Ilaqutariit utaqqiisaasumik ineqartut nallinnartarnermik.

Isumaqarpunga angutit misigissutsimikkut uagutsinniit sunnertiannginnerusut.

Sungiunneqarsinnaavorli. Suliap misigissutsillu immikkoortinnissaat maanna pikkoriffiginerulerpara, pinngitsoornatami immikkoortissinnaasariaqarpagut.

ILAQUTTAT QAFFAKKIARTORNERMIT PINGAARNERUPPUT
Margrethe siornatigut kommunimi tenikeqarnermut immikkoortortaqarfimmi ukiorpaaluit pisortaasimaluarpoq, massakkulli atorfimmini qaffakkiartunini unitsillugu INI-mi inissiaqarfinni nakkutilliisutut suleqqilerpoq. Taamaasiorpoq ilaquttani pingaarnerutikkamigit:
– Meeqqama pisariaqartinnerummannga taamaasiorpunga.

Arnat taakku arlaannaalluunniit suliffimminni qaffakkiartornissaminik pilersaaruteqanngilaq. Imalu nassuiaapput:
– Arnat atorfimmi qaffakkiartornermut angutitulli soqutigisaqartiginngillat. Arnat salliuniarpallaartanngillat. Pingaartumik meeraqaraangamik angutiniit allaanerusunik pingaartitaqartarput. Ilaqutariinneq ingammillu meeqqat pingaartinneruagut.

ARNAT QAANIARITSI!
Ansop, Kristinep aamma Margrethep maluginiarneqartarnertik sungiusimavaat, teknikimummi tunngasunik ilinnialeramilli anguterpaat akornanni arnartartuaasimapput, tassa ikinnerussuteqartuusimapput.

Arnaanerat maluginiarneqartuartarpoq.

Aammami ajunngitsortaqarpoq. Teknikimummi tunngasunik ilinniarsimanerat pillugu alutorineqarlutillu ataqqineqartarput:
– Teknikimut tunngasuni suliassat assigiinngiiaartuupput, anguterpassuillu oqarfigisarpaatigut arnartaqalernertik eqeersaataasoq.

Ataatsimut isigalugu anguterpaat akornanni arnartuaanerup pitsaaqutai ajoqutaanniit amerlanerupput, arnat taakku pingasut taama isumaqarput.
– Angutit suleqatigalugit nuannarineruara. Arnat arnaqatiminnut oqaluppallaartaqaat, Kristine oqarpoq, Ansolu isumaqataalluni nangippoq.
– Taamatut ilinniagaqarumavunga angutinik suleqateqarniassagama.

All. Christine Stampe Frøsig

Kristine J. H. Christensen

Ukiui: 43
Maniitsumi inuuvoq, 1985-imiillu Sisimiuninajugaqarluni.
Ilinniagai: Ikastimi Handelshøjskole aamma Sisimiuni Sanaartornermik Ilinniarfimmi teknisk assistentitut
Atorfia: INI-ni inissianik nakkutilliisoq
Misilittagai: Illuliassanik titartaavimmi (Sanati) ukiut 15-it, Pisiffiup sanaartornermut immikkoortortaani ukiut pingasut, INI-mi ukiut pingasut.
Ilaqutai: Ueqarpoq pingasunillu meeraqarluni
Sooq teknikimut tunngasunik ilinniarsimava: Teknisk assistentimut ilinnialertinnga Sanatimi ukiut qulit allaffimmiutut sulivunga. Taava teknisk assistentitut ilinniarnissannik Sanatimit neqeroorfigineqarama akueraara. Peqqissimissutiginngilara, tassami suliaq unammillernarlunilu assigiinnitsorpassuarnik sammisaqarnarpoq
Atorfiup nuannersui: – Suliassat assigiinngiiaartut unammillernartut. Inunnik attaveqarluarnartoq, tassa ineqartut, sulisartut aamma kommunimilu sulisut. Taakkulumi suliatta pitsaanerpaamik ingerlanneqarnisaat pillugit oqaloqatigiittuartarpugut.

Margrethe Ane Sofie (Anso) Reimer

Ukiui: 41
Uummannami inuuvoq, Nuummi alliartorpoq
Ilinniarsimanera: Teknisk tegner
Atorfia: INI-mi inissianik nakkutilliisoq
Misilittagai: Illunik titartaasartut – ingeniørillu titartaasarfianni sulineq, kommunep teknikimut immikkoortortaqarfiani sulineq aamma qisuerniarfimmi mikisumi formandiuneq.
Ilaqutai: Ueqarpoq pingasunillu meeraqarluni
Sooq teknikimut tunngassunik ilinniarsimava: Teknikimut tunngasut pissanganartuummata.
Atorfiup nuannersui: – Atuisunut, sulisartunut suleqatinullu allanut attaveqartarneq, suliassanik pingaarutilinnik naammassisaqartarneq, ullullu tamaasa immikkuullarissunik misigisaqartarneq.

Margrethe Ane Rosing Hegelund

Ukiui: 38
Paamiuni inunngorlunilu alliartorpoq
Ilinniarsimanera: GU aamma byggetekniker DK-mi
Atorfia: INI-mi inissianik nakkutilliisoq
Misilittagai: INI-mi ukiut marluk nakkutilliisuuneq, kingorna Paamiuni ukiut marluk kommunep teknikimut tunngasunut immikkoortortaqarfiani sulineq, kingorna immikkoortortami tassani pisortaaneq ukiuni 3½ -ni, massakkut INI-mi inissianut nakkutiliisuuvoq
Ilaqutai: Ueqarpoq pingasunillu meeraqarluni Sooq teknikimut tunngasunik ilinniarsimavaa: Siullermik ingeniøritut ilinniarluni aallartikkaluarpoq, semesterilli aappassaa taamaateriarluni teknikeritut ilinniarpoq
Atorfiup nuannersui: – Unammillernartuuvoq, allanngorartuullunilu nuannersuuvoq. Soqutigisaqaqatigiit assigiinngitsut attavigisarpakka, ingammik sulisartut. Naammassisaqartartutut misigisarpunga soorlu sanaartornermut tunngasunik.

Alex najanilu jorngunilu Niclas. – Jorngora /soraluara asaqaara pitsaanerusumillu ikiorneqarnissaa kissaatigigaluaqaara.

– Ikiorneqanngikkaanni susinnaanani inuuneq qanoq innersoq takorlooruminaappoq. Assut ajussaaq, taama oqarpoq 32-nik ukiulik Alex Andersen, Nuuk.
– Najaga jorngoralu Niclas eqqarsaatigigaangakkit aliasuttarpunga. Pitsaanerpaamik pineqartariaqaraluarput. Inuimmi tamarmik kiffaanngissuseqarlutik inuunissamut periarfissaqartariaqaraluarput, Alex oqarpoq.

Alex Andersen Qeqertarsuarmi inunngorpoq, inuunermili annersaani Nuummi najugaqarluni. Assigiinngitsorpassuarnik sammisaqarpoq, amerlanerilli Chilly Fridaykkunni tumerparpaartartutut ilisarisimavaat.
– Anaanannit pingasunik najaqarpunga, ataatannillu nukaqarlungalu najaqarpunga. Qatanngutima amerlanersaat Danmarkimi najugaqarput. Tamaasa attaveqarfigilluaraluarpakka, kisianni akulikinnerusumik takorusuttaraluarpakka. Taamalli immitsinnut ungasitsigisumiikkatta takukulanngilagut.

Alex Andersen assut qanitaminik jorngoqarpoq.
– Najama angajulliup ernera inunnguutsiminik arlalinnik innarluuteqarpoq. Oqalusinnaanngilaq, taamaakkaluartoq immitsinnut paasilluarsinnaavugut. Akornatsinni qanilluta attaveqarpugut, taassumalu qungujulaneq illarnerlu kisiisa oqaaserai.
– Najama inuunera artornartuuvoq. Kisimiilluni tunniusimalluinnarluni ulloq unnuarlu ernini paarsaraa.
– Jorngora Niclas qaqutigooraluartumik pulaaraangat nuannisaartarpugut guitarerlutalu pattattarpugut. Spastikeriugami timaa assut sukangasarmat pulaaraangat tagiartortarpara. Tassami timimi qasukkalaarsinnaanera iluaqutigisarmagu qasukkartinissaa pisariaqarluinnartarpoq.
– Najama ernini kissumiartuaannartuugamiuk
assammigut suliaritittariaqarsimavoq.
– Najaga inatsisit malillugit inunnik marlunnik ikiorteqarlunilu ilaqutariinnik ataatsinik ernermi ornissinnaasaannik ikorfartorteqartariaqaraluarpoq, taamaattoqanngilarli.

Danmarkimut nuunniarluni oqaluttarmat paasisinnaalluarpara. Taamami ikiorteqanngitsigaluni ernini paariuaannaramiuk soorunami qasusarpoq.
– Piffissap ilaqujussua allamut nikissinnaaneq ajorpoq. Parnaarussaasutut ippoq. Qujanartumilli Niclas atuartinneqarpoq. Ilinniartitsisoqarlunilu ilinniartitsisua ikiorteqarpoq. Arlaalli napparsimappat atuariartorsinnaanngilaq.
– Taamaattumik najaga sumilluunniit siumut pilersaarusiorsinnaanngilaq, Alex Andersen oqarpoq.

SINNATTUT
– Niclas inuunini naallugu imminut ikiorsinnaassanngilaq. Uangali aalajangerpunga naalungiarsuttut iliorfigisarniarnagu. Ukioqataasa 7-8-nik ukiullit qanoq iliorfigineqartarnerattulli pisarpara.

Alex Andersenip marloriarluni jornguni pillugu sinnattorsimavoq.
– Niclas peqingasorujussuarmik qatigaqarpoq, unnualli arlaanni sinnattulerpunga qatikkani qerattarlugu uagutsitulli issiasinnaaleriataarsimasoq.
– Aamma arlaanni sinnattorpunga Nicklas tassanngaannaq oqalussinnaalersimasoq.
– Qularnanngilaq kissaatiginerpaasakka sinnattorisarikka.
– Aamma eqqarsartarpunga nuannissagaluaqaaq ullut arlaanni naalakkersuisut siulittaasuata Hans Enoksenip najaga taarsersinnaasuugaluarpagu.
Taava ulloq naallugu jorngora paarissagaluarpaa. Ulloq ataasiinnarluunniit paarissallugu saperaa nalunngilluinnarpara.
– Soorunami najama jorngumalu inuunerat uannut sunniuttarpoq. Eqqarsaatigiuaannarpakka. Pitsaanerusumimmi pineqartariaqaraluarput.
– Inuit atugarliortut pisortanit soqutigineqanngippallaaqaat.

IMIGASSAQ UNITSIPPAA
Alex Andersen ukiut sisamat matuma siorgut imigassartorunnaarlunilu pujortarunnaarpoq.
– Ukiortaami ullaassakkut nal. marlunut Kajistiinaaqqamiippunga pingasunik paajaateqarlunga poortanillu marlunnik cigarettiuteqarlunga.
– Eqqanniittut isigeriarlugit imminut oqarfigaanga »maaniuna susunga, maaniikkusunngilanga«.
– Kingunitsianngua angerlarama imerunnaarlungalu pujortarunnaarpunga. Tamatumalu kingorna aappartaani maanna aapparisani Aggo Rosing Olsen naapippaa.
– Aggo aamma imigassartorneq ajorpoq, taamaammat tuppallernartumik tunissutisisimasutut misigaanga Aggop imerunnaarninni tapersersorsinnaammanga.
Ukiut marlussuit qaangiummata rødviinnimik tuniniarneqarami nakkaannarpoq, tassalu arriitsumik imertaleqqilluni.
– Rødviinnisorlunga aalakoorpunga peqqissimissutigisannillu iliuuseqarlunga.

Taamaasillunga paasivara imigassap sunneraanganga killissara sinnerlugu iliuuseqartarlunga, tamannalu paasigakku tassa unitsivippara.
– Inuuvunga allanit maluginiarneqartorujussuaq. Nipilersortartutut ilisarisimaneqartuugama inoqatima ingalassimanisaat arriitsumik ilikkariartorpara. Ilisarisimaneqartuulluni isiginiarneqarneq malunnartaqaaq.
Isumaqartarput ilisarisimallunga naak uanga nalugitsik. Inuit uannut qanillivallaarnissaat pinngitsoorniarlugu nukippassuit atortariqartarpakka.
– Imigassartorunnaarama qanillineruakka. Imminummi nassaareqqippunga. Imminut inoqatinnullu ilumoornerulerpunga.
– Siornatigut kalikkuminaqaanga. Sunnersiasimaqaanga, maannakkulli silatunerulerpunga.
– Imertarallarama inuit ilisarisimanngisama ornittarpaannga ajornartorsiutitillu pillugit oqaluttuuttarlunga. Inuit inoqatitik ilisarisimaneqartut assut qaninniartarpaat.

Inuit uannut taama piumasaqartarnerat oqimaatsuuvoq. Ilisarisimaneqartutut inuuneq aamma ilikkarneqartariaqarpoq, taamaasiunngikkaannimi atornerluisoqarsinnaavoq.
– Utoqqaliartortilluni inuuneq allanngortikkuminaalliartortarpoq. Imertarunnaarama ikinnguterpassuarma ilaat ikinngutigiunnaarpakka allanillu ikinnguteqalerlunga. Kikkummi ikinngutiviunersut aatsaat paasivara, taakkulu suli ikinngutigaakka.
– Inooriaaseq allanngortillugu oqitsuinnaanngilaq. Arlalippassuit ammmut killissartik tikikkaangamikku inuuneq soqutiunnaartarpaat. Allallu imerunnaaraluarlutik imeqqilersoortarput, eqqarsartaramik imerunnaaqqikkuma ullut marluk qaangiuppata suna tamarmi iluarseqqissaaq, taamali ajornaatsiginngilaq. Ajornartorujussuuvoq, ilaannilu aatsaat qaammaterpassuit imallunniit ukiorpassuit qaangiukkangata qaangerneqarsinaavoq.
– Pinngitsoorsinnaannngisat allangorsinnaapput. Siornatigut pujortagassat imigassallu pinngitsoorsinnaanngilakka.

Ullumikkulli pinngitsoorsinnaanngisara tassa sulineq, tassami ingasattumik sulisalerpunga. Taamaattut taasarpaat Workaholic.
– Piffissap pinngitsoorsinnaanngisaqalernerup tungaanut atorsimasap sivisoqataa atorlugu pinngitsoorsinnaanngisaqarneq qaangerniarneqartarpoq, Alex Andersen oqarpoq.

ILUANAARPUNGA
– Ullumikkut peqqeqaanga. Makikkaangama inuunera nuannaarutigisarpara. Nerisassaqarpunga aamma imigassartortariaarullungalu pujortartariaaruppunga.
– Kalaallit nunaanni ajornartorsiutit annersaat tassa atornerluineq. Atornerlutat assigiinngissinnaapput: Imigassat, ikiaroornartut imaluunniit meeqqat. Atornerluinermullu patsit tassaavoq inuup imminut ammut isiginera.
– Tamanna oqaloqateqartarnikkut aamma inoqatinik tatiginnilernikkut qaangerneqarsinnaavoq, Alex Andersen taama isumaqarnerarpoq.
– Ajunngivissunik illoqarpugut, atisarippugut, kusanartunik biileqarpugut, piviusorli tassa inuppassuit pilluaallutik inuummata.
– Immitsinnut matoqqavallaarpugut aamma oqaloqatigiittanngippallaarpugut. Taamaattumik matumuuna inuit kajumissaarpakka ammarlutik ilumiutik inoqatiminnut anittaqqullugit.
– Nuannarisatit asakkit, aamma ajunngikkaangavit, Alex Andersen oqarpoq. Ukiut 10-t qaangiuppata sulerissavit?
– Meerartaareersimassaanga. Inuuneralu ima aqussinnaalertigisimassavara meeqqakka pitsaanerpaamik perorsarsinnaalersimassallugit.
– Taamanikkussami imminut tatiginerulersimassaanga,tamanna upperivara.

Kissaatigisarami angujuminaatsuunngilaq,tassa pitsaasumik inuuneqarneq.

Alex Andersen Qeqertarsuarmi 1976 inuuvoq.

13-inik ukioqarluni tumerparpaartalerpoq. 1992-imi nipilersortartut »Affray« pilersippai, taakkulu ukiuni 6-ini atapput.

1998-imi »Affray« unimmat Alex ukioq ataaseq nipilersornermik sammisalimmi højskolemiippoq. Kingorna nipilersortartunut »Sialuit«-kunnut ilannguppoq, tassanilu Malik Kleist naapippaa. ”Sialuit” misileraallutik popinik rockinillu nipilersortartuupput, sivisuumilli atanngillat. Sialuit taamaatimmata Alexip Maliullu 1999-imi ukiukkut nipilersortartut Chilly Friday marluullutik aallartippaat.

Alex aamma Nuummi Nipilersortartut peqatigiiffiannik aallartitseqataavoq, nipilersortartullu nunarput tamaat kattuffeqalerneranni aamma suleqataasimalluni.

Suliffeqarfiup Greenland Media Group-ip aallartinnerani suleqataavortaaq.Greenland Media Group tassaavoq suliffeqarfiit assigiinngitsut suleqatigiiffiat.

Aamma nipilersortartoqatini Eigel Petersen suleqatigalugu aallartippaat Ice Music Aps, tassaasoq nipilersukkanik siaruarteriffik.

Taamatuttaaq pikkorinneqqi - saannermi »Inuvoice«-imi aaqqissueqataavoq. Inuvoice ukioru KNR-TV-mi aallakaatinneqartussaavoq.

Alex Andersen-imut apeqqarissaarutit

1. Viinni imaluunniit imeq?
Imeq. Ukiut 4 ½ matuma siornagut imigassartorunnaarpunga. Timitta annersaa, tassa 70 procentia imiuvoq, aamma nerinngikkaluarluni imiinnarmik sivisuumik inuusoqarsinnaavoq, viinni taamatut iluaqutigineqarsinnaanngilaq.

2. Pizza imaluunniit puisi?
Uha… qeqertannguami kisimiilissagaluaruma puisitorusunnerussaanga, kisianni ulluinnarni qaqutiguinnaq puisitortarpunga.

3. Sumi feeriarusunneruit sissami imaluunniit illorpassuaqarfimmi?
Sissami. Ulapaarunnnaarlunga sissamiissinnaasuugaluaruma qanoq nuannertigissagaluarpa.
Biilit nipiliortut qimallugit sissamiilluni imarpalaannguaq tusarnaarusaarlugu qanoq nuannertigaa.

4. Qanorooq imaluunniit tv-avisen?
Tamaasa. Nutaarsiassanik malinnaaneq pingaartippara.

5. Mobiltelefoni imaluunniit qarasaasiaq?
Qarasaasiaq. Taannami sorpassuarnut atorneqarsinnaavoq…

6. Festi imaluunniit angerlarsimaneq?
Angerlarsimaneq. Ukiut tallimat matuma siornaasuuppat oqassagaluarpunga festi. Angerlarsimalluni ikinngutit ilagalugit eqqissilluni oqaloqatigiinneq, nereqatigiinneq amma kaffisoqatigiinneq tassa nuanneq.

7. Kikkut tusarnaartitsisut tusarnaarusunneruigit: Nuna allamiut imaluunnit kalaallit?
Nuna allamiut assut alutornartarput. Kisianni kalaallit tusarnaarlugit aamma nuannertaqaaq, pikkorissorsuuppummi. Kalaallit nipilersortartut isiginnaartitsivimmi nipilersullaqqipput nunat allamiulli isiginnaartisivinni isiginnaartitsillaqqipput.

8. Kisimiinneq imalluniit inoqatit akornanniinneq?
Kisimiillunga inuusinnaanngilanga, kisianni kisimiillunga »imminut ilummut isigineq« nuannaraara.

9. Biili angallalluunniit?
Biili. Taanna iluaqutigalugu piffissarujussuaq sipaartarpara. Angallat aasakkuinnaq atorneqarsinnaavoq biilili ukioq tamaat.

10. Pisunneq imaluunniit arpanneq?
Arpanneq. Pisuinnarnissannut piffissaqanngilanga.

All. Irene Jeppson