Arnanut

Meeqqat taquassaannik piareersaaneq nuanniitsuusariaqanngilaq tuaviuuttariaqaranilu. Meeqqat taquassaannik piareersaaqatigineqarsinnaapput nuannisaqatigalugit. Meeqqat inuusuttullu namminneq qaqutiguinnaq taquassaminnik piareersaasarput, taamaattuaannanngilarli. Nukappiaqqat Nuummi katsorsaavimmi MATU-mi ullut tamaasa nerisassiortarput - aamma taquassaminnik piareersaallutik. Tamanna pissutissaqarluarpoq.

Nakuuserneq nerisassallu
MATU nukappiaqqanut kamajasunut sisamanut angerlarsimaffiuvoq, katsorsaariaatsinut pioreersunut naleqqutinngitsunut. MATU-mut inissinneqartarput inuiaqatigiinni nukappiaqqat kamajanerpaat, sivisunerusumillu tassaniittarput. Tassani sulisunit ataqqineqarput, piginnaassutsinillu ilinniarlutik MATU-mut pisimanngitsuugunik ilikkarsimanngisaannagassaraluaminnik. Tassani nukappiaqqat ilinniartarpaat inuuneq tassaaginnaanngitsoq nakuuserneq.
Naatsumik oqaatigalugu MATU-mi siunertaavoq; nukappiaqqat ilorraap tungaanut aallarteqqinnissaat, tassaneereerunik inuusuttut allat assigalugit pitsaasumik inuuneqalersinniarlugit.
Nukappiaqqalli kamattut, nakuuserneq nerisassiornerlu imminnut qanoq attuumassuteqaramik, immaqa eqqarsarputit?
Aap, MATU-mi nerisassiorneq katsorsaanerup ilagilersimavaa pingaarutilik, tassa tassani tunngaviusumik malittarisassaammat; Amerlanerusut sapinngikkukkit taava imminut tatiginerulerlutillu tulluusimaarutiginerulissaatut. Soorunami aamma nerisassiorneq ilaavoq. MATU-mi suliniutip pisortaa Stephen Hackesberg nassuiaavoq;
– Angut nukimminik nerisassiornermut atuisoq nukiisernissaminut piffissaqanngilaq, pissutigalugu piffissaq igaffimmi atoramiuk pilersitsiniarnerminut, tassa nerisassiornerminut, pingaartumik mamartunik nerisassiussagaanni tamanna aaqqissuussaasumik sulineruvoq, malinnaanermik, pissusissamik eqquinermik pilersitsinissamillu pisariaqartitsisoq, Stephen Hackesberg oqarpoq.
– Paasisimavarput ataatsimooqatigiinnertigut nerisassioqatigiinnertigullu inuunerup pitsaassusaanik ineriartortitsilluta, atuisartutut isiginnaaginnartuunata.

Igapput
Tamatigut ajornaatsumik nerisassiortoqarsinnaavoq, neqi igamut ikiinnarlugu qalaallugulu. Aammattaarli neqimik tassannga pitsaasunik nerisassiornissaq toqqarneqarsinnaavoq. Ilami peqqissaarullugu nerisassiortarput, nerisassiuinnaratik. Tassami Stephenip oqarneratut, annertussusaa pinnagu pitsaassuseq pillugu.
- Illumi maani pissanganartunik nerisassiortarpugut, nerisassiallu qanoq sassaalliutiginissaat sammisartorujussuuvarput illinnartuulluaqqullugit. Nerisassiornermi sianissutsit tamarmik atorneqartarput, tassa immikkoortualuit peqqissaaruttaratsigit. Taamaasiornikkut peqatigiilluartarpugut tamannalu peqatigalugu nutaanik ilinniartarluta, Stephen Hackesberg oqarpoq.
Nukappiaqqat sinnersaraallutik nerisassiortarput, sapaatillu tamaassa unnukkut pingasunik immikkoortulinnik nerisassiortoqartarpoq, illinnarsaarlugit sassaalliutigineqartartunik.

Taqussani asanninneq
Taanna isumaqarpoq uagut inersimasut qitornavut igaffimmeeqatiginerusariaqarivut, taamaasiortoqarsinnaavorlu assersuutigalugu taquassanik piareersaaqatiginerisigut.
– Angajoqqaat qitornatik taquartikulavallaaqaat illinnaatsunik tuaviuussanik, ilaasalu meeqqat aningaasanik nerisassarsiutissaannik tunisarpaat. Ilaat taquaqanngivittarput. Tamanna uggornarpoq, Stephen Hackesberg oqarpoq.
– MATU-mi nukappiaqqat taquagissaartittarpavut. Uagutsinnit tunissuteerannguatut, takutinniarlugit soqutigigivut. Tassuuna takutippavut asagivut, ilungersuukkivut isumassorivullu, tassami taqussat uummatittsinnik sanasaratsigit. Eqqarsaatigeriaruk meeraq qanoq nalunaarfiginerlugu - ullut tamaasa.
– Allaammi nerisassat asanninnertut isigaavut, pissutigalugu nerisassanut asanninnermik pilersitsigatta. Inuunerup ilagaa misigissaasoq, nerisassat pinngitsoorsinnaanngilagut. Taamaattumik piareersarluartarpavut, nukappiaqqammi nerisassiornerminnik qisuarfigineqartarput, pissutigalugu nerisassat nuannarineqartarmata, allanullu nerisassiuussisinnaaneq uppernarsarneqartarmat.

Nukappiaqqat MATU-miittut atuariartoraangamik tamatigut pissanganartunik allaanerusunillu taquaqartarput. Taquaat illinnartuupput, peqqinnartuullutik qaarsillarnarluartuullutillu. ARNANUT MATU pulaarsimavaa taquarisartagaat paasiniarlugit, ARNANUT atuartartunut takutikkumallugit. Aqqa Mikaelip 13-inik ukiullip, Angunnguup 15-inik ukiullip sulisulu Thomasip akunnerup ataatsip ingerlanerani nerisassat makkua piareersarpaat. Nerilluarisi!

OOQANNGITSUT
Unnukkorsiutinut naleqqulluartut, taqussanullu ilapittuutit. MATU-mi nukappiaqqat ilaata atuarfimmut taquarisarpai spisepinde-nillu nerillugit.
1/4 hvidkåli
1/2 kg gulerøddit
2-3 appelsinat
Hvidkåli gulerøddillu aggulunneqassapput.
Appelsinat savimmik qalipaajakkit qaqortortaat peerlugu.
Angallataasatut aggukkit ujarattaalu qeqqaniittut peerlugit (aamma qaqortut).
Appelsinat saattunnguanngorlugit aggorneqassapput saftialu hvidkålimut gulerøddinullu kuineqassaaq.
Seqquluttuaqqanik akuukkit.

GRØNSAGINIK MUFFINS
Naqittagaq:
2 manniit
250 gr. qajuussat
1 alussaateeraq taratsut
2 alussaateeqqat pulluassaatit
3 dl immuk
Tamaasa akulerullugit nipputtaartumik naqittarneqassapput.
Ærtat 100 gram majsillu 100 gram akulerunneqassapput.
Naqittagaq muffins-iliorfinnut 36-inut ikiuk 200 gradinillu kissassusilimmi minutsini 20-ini iffiukkit.
Piroggit russit nerisassaatigaat qaarsillarnarluartut.
Imassai assigiinngitsut misilerarsinnaavatut.

PIROGGINNUT 8-NUT NAQITTAGAQ
1 qapuit
400 gr. miss. qajuusat
200 gr. miss. Iifialiassat imlt. grahamsiliassat
5 dl. miss. imeq
1 dl. olie
1 alussaateeraq taratsut
1 alussaateeraq sukkut
Naqittarneqassapput naqittagarlu akunneq ataaseq pullassarneqassalluni.
Naqittagaq 8-nut aggoruk siaartiteriarlugillu imassai ikikkit.
Tamatuma kingorna naqittagaq ajassaammik naqillugu matuneqassaaq, piroggillu mannimmik aalaterneqarsimasunik imermik akulimmik tanikkit.
200 gradinik kissassusilimmi minutsit 30-it missaanni iffiukkit.

IMASSAI 1 PIROGGINUT 8-NUT
Nerpik aserortigaq 500 gr imaluunniit saarullik suluppaagarlu akulerussat mamartorujussuupput.
1 puussiaq spinat
1 alussaateeraq taratsut
Tamarmik imminnut akulerussuutissapput.

IMASSAI 2 PIROGGINUT 8-NUT
200 gr. neqi. Toqqarsinnaavatit tuttup nersussuulluunniit neqaa saattunnguanngorlugit aggukkat imaluunniit neqi aserortigaq.
2 alussaateeqqat karry nalinginnaq
1/45 hvidkål aggoqqissaagaq

FJELDKIKS
100 gram sukkulaat taartoq
500 gram marcipan
Marcipani iffiornermi atorneqartartoq kiksinut naleqqulluarpoq
1 1/2 rulle mariekiksit

Pølsehornit nuannarineqassaqaat, tassa qularutissanngimmat meeqqat mamarissaqigaat.

PØLSEHORN
1 qapuit
1/2 dl rapsolie
4 dl imeq kissalaartoq
500 gr qajuusat
1/2 alussaateeraq taratsut
1 alussaateeraq sukku
Nippoqqaaluttunngorlugit naqittarneqassapput, naqittagarlu akunnerup ataatsip missaani pullassassaaq.
100 gr. qajuusat Knækket boghvede imermi 3 dl.-imi minutsit 10 missaanni qalaanneqassapput, nillarserneqarlutillu.
Tamatuma kingorna naqittagaq boghvede-lu qajuusanik 2-300 gramini akuneqassaaq, 20-inngorlugu aggorneqassalluni, taakkua pølsinut imuneqassapput taavalu mannimmik aalaterneqarsimasumik imermik akulimmik taninneqassallutik. Pølsehornit 200 gradinik kissassusilimmi minutsit 30-it missaanni iffiorneqassapput.