Jukku, Lulu aamma Lajla TupaarnaqUkioq 2002 naajartulerpoq. Jukku www.scor.dk-mi profileqarpoq, arneriniakujuinnarfigisaminilli. Piffissami tassani inuunerani pisoqarpoq allannguinissamut eqqarsalersitsisumik, inuunermillu nalilersueqqiffiusumik.

Lulu paneqarpoq, Naasunnguaq, namminerlu piumassuserisaminik ukiorpassuit aappaqanngilaq. Inuunermini killiffik tikippaa aappaqaleqqinnissaminut piareerluni. Kammalaataata siunnersorpaa www.scor.dk-mi profililioqqullugu. Lulup imminut ilisaritinnermini allaaserai inuunermini killiffini, angorusutani minnerunngitsumillu angummik qanoq ittumik naapitserusunnini. Jukkup Lulup profilia takoreerlugu allaffigaa nammineq oqarneratuut „mamarunarpallaaqimmat“. Lulup Jukku akivaa immaqa tulluarpallaaratik. Jukkummi profilia arneriniakujuppasinnerusumik nipilik atuarsimavaa. Jukku nassuiaavoq inuunermini killiffimminik, profilimilu allanngortinnissaa eqqarsaatigalugu. Taamaalillunilu attaveqatigiinneq aallartippoq.

Pissanganeq
Nuummi qinngutsinniippugut, inissiani nutaani alutornaqisuni. Angerlarsimaffik nuannersoq najorparput, meeraqarneranik qimmeqarneranillu ersersitsisoq. Silammut qiviaraanni isikkivigippoq, illoqarfiummi avataaniikkami. Aappariit imminnut „asasa“-artorput, imminnut attullattaarlutik, nuannariippasillutillu qiviartarlutik. Lajla Tupaarnaq, imaluunniit „scor.dk“-araq, marlunnik ukiulik arpaqattaarpoq.

- Attaveqaqatigiileratta inuunitsinnut tunngasunik eqqartueqatigiittarpugut. Suut angorusunnerlugit, ilaqutartaarusunneq, atoqatigeeriaatsit assigisaallu. Immitsinnut ammaffigivugut. Pingaartissimavara ingerlaannaq naapissanngitsugut, immitsinnulli ilinniaqqaassasugut. Nuummioqatigiikkaluarlutali kinaanerput aalajangiussinnaanngiivipparput, Lulu oqaluttuarpoq. Sivisuumik inuttarsinatik allaqatigiittarput, kingornalu sms-eqatigiittalerlutik.

Ateq: Lulu Holm Nielsen
Ukiui: 35
Suliffik: Immikkoortortami peqqissaasoq

Ateq: Jokum Nielsen
Ukiui: 46
Suliffik: Tusagassiortoq

- Kisianni oqaluutinngilagut. Ataqqivara Lulup eqqissilluta ilinniaqqaarnissatsinnik piumasaqarnera, Jukku oqarpoq. Ukioq 2003 aallartippoq, sulili imminnut naapinngillat. Ullulli ilaanni Jukku silami pisulluni pisiniarfiit ilaannut ilummut qiviarluni Lulu-gunavissoq takuaa. Qanoq ililluni pinerpoq malugaa ilumut taannaasoq, sms-erfigalugulu aperaa taannaanersoq

- Assut tupappunga. Tassami uangaavoq. Allaffigaaralu ornissanngikkaanga, taamatut naapikkusunnginnakku. Eqqarsarpunga tassa immaqa marsertarsimagaanga, illoqarfimmilu malerusaartarlunga, Lulu illarluni oqaluttuarpoq. Pisiniarfimmiit anigami angutit saneqqutani tamaasa qissimittarpai, eqqarsarluni “immaqa aana”.

- Immaqa aanarsuaq, Jukku ilaliivoq.

Naapinneq
Sivisuumik allaqatigeereeramik naapinnissartik siunniuppaat. Lululli pingaartippaa naapinnermi siullermi Jukkumut panini naapitsikkusunnagu, sulimi attaveqaqatigiiginnassanerlutik nalugamikku. Isumaqatigiipput ulloq 25. Januar, 2003, naapinniarlutik.

Ulloq taanna Jukku akissarsivoq. Nujaleritippoq, atisartaarluni tipigissaatisillunilu. Isumaqatigiipput unnukkut Lulup panini innartereerpagu, Jukku pulaassasoq. Pissanganeq.

- Assut pissangagivara naapinnerput qanoq ingerlassanersoq. Ammalluta attaveqaqatigiinnerput nuannersoq nangeqqiinnaassanerpa? Immaqaluunniit paasissavarput immitsinnut ungaseqaluta?, Lulu oqaluttuarpoq.

Jukku pisussaq pillugu pikisimaqisoq, champagnemik jordbærinik sukkulaatinillu nassataqartoq Lulumukarpoq.

- Nuannaajallaqaanga angut kusanarluni, pikisimalluni, nassataqarlunilu takkummat, Lulu illalaarluni oqarpoq.

Naapinnerat iluatsippoq. Soorlulusooq allaqatigiillutik attaveqaqatigiinnerat nangeqqiinnartoq. Attaveqaqatigiinneq allaanerunngilaq. Lulu inuk ittuutugaluaqaluni Jukku naapikkamiuk ittoorfeqanngilaq. Unnuaq naallugu oqaluupput, Jukkulu Lulup paniata naapinnissaanut akuerisaavoq. Jukku anilermat kunipput.

- Nuannariittorujussuuvugut. Tamassumunnga peqqutaavoq aallaqqaammulli attaveqaqatigiileratta immitsinnut ilumoorfigaluta pigatta. Taamanili qimanngilagut, Jukku oqarpoq.

Inuuneqarsinnaavoq nuannersumik
- Asasaq, naartulernera eqqaassavarput? Lulup Jukku aperaa. Aap.

Lulu siornatigut nalilerneqarnikuuvoq naartusinnaanera 50 %-iinnaasoq. Taamaakkaluartorli naapeqqammiinnarlutilli naartulerpoq. Naak naapeqqammertigalutik pisoq taamaattussaannartut isigaat.

- Isumaqatigiippugut pigiinnarniarlugu. Nuannariingaaratta annerusumik eqqartunngilarput. Naapinnerput uannut takutitsivoq inuuneqarsinnaasoq nuannersumik. Siornatigummi aalajangersimasumik anguniagaqarlunga inuunngilanga. Paasivara inummut allamut imminut tunniuteqqissaartoqarsinnaasoq, inullu alla uannut aamma tunniuteqqissaarsinnaasoq, Jukku oqarpoq.

Naapikkamik qaammat qaangiummat Lulu naartusoq paasivaat, qaammatit pingasut qaangiummata illusipput, ukiorlu sunngitsoq qitornipput. Avatangiisiisa naapinnerat, naaperiaasiallu immikkut ittoq nuannaraat.

- Arlaannaataluunniit apeqqusinngilaa pisut sukkasuumik ingerlanerat. Takusinnaavaat nuannariittugut, immitsinnullu tunniusimasugut. Aamma ilaquttagut ingerlaannaq imminnut atalerput, Lulu oqarpoq.

Imminut ilumoorfigineq
Internetikkut naapinnerni tamani Jukkutut Lulutullu iluatsitsitigisoqarneq ajorpoq. Iluatsitsinertillu pissutissaqartippat.

- Siullermik nammineq inuttut ilumoorfigivugut, suut angorusunnerlugit nalunnginnatsigit. Aappaattut attaveqarfigisarput ilumoorfigaarput, suut angorusunnerlugit ilumoorfigigatsigu. Taamaalilluni suna tamarmi soorlu sisoorluni ingerlasoq. Jukku oqarpoq.

Lulup assersuutitut taavaa, ataasiarluni allaqateqartaleraluarsimalluni, assut nuannarilikkaminik. Naapikkamilli assigiinngissusertik paasivaat, soorlu naajaq tulugarlu susassareqatigiinngingaaramik.

- Taama pisoqarunarpoq, taamani suniarnerput nalugatsigu. Kisianni ilikkarfioqaaq, Lulu oqarpoq.

Lajla Tupaarnaq, ”scor.dk-araq”, suli arpaqattaarpoq. Naapeqatigeeriaatsip nutaap kingunera.



All.: Aminnguaq Dahl Petrussen
Ass.: Knud Josefsen

Janus Kleist

Angut kusanartuuvoq, pinnersoq. Takisuujuvoq, tuattuulluni piukkunnaqalunilu. Angutinut filmiliaritittartunut, assilisittartunullu tusaamasanut kusanartunullu sanilliunneqarsinnaalluartoq.

- Sivisuumik www.dating.gl-mi ilaasortaanikuuvunga, sulili uannut tulluarsinnaasumik naapitsinngilanga, Janus oqaluttuarpoq. Sooq?!? Narrutoqinerami? Imaluunniit takunngitsoorneqaannarsimanerpa? - Naamik, uangaana nammineq uannut tulluartumik suli nassaannginnama, immaqa narrutulaarama, Janus oqarpoq.

Kinaassusivini takutippaa

Janusi www.dating.gl-imut nuannariinnarlugu ilaasortanngorpoq. Siornatigut tusaqqaaramiuk taamatut naapittoqartartoq eqqarsarsimagaluarpoq qaquguluunniit nammineq tamakkununnga ilanngunniarnani.

- Takorloorpara inuit aappassaarutivissortut, allanik nassaarsinnaanngitsut kisimik tamakkunuuna ujarlertartut. Paasiartulerparali inuit uattut ilittullu ittut, ilaatigut nuannariinnarlugu ilaasortaasartut. Aamma taamani aappaqannginnama, iluatsiinnarlugu ilaasortanngorpunga, Janus oqaluttuarpoq.

Janusip profilimini assini atinilu ilannguppai. Isumaqarpoq ilumoorluni kinaassusivini takutikkuniuk imminut ilumoorfiginerussalluni.

- Pitsaanerutippara uangaassusera tamaat ersersikkukku, inuit taava nalunnginnerussammassuk kina allaqatiginerlugu, Janus oqarpoq.

Ateq: Janus Kleist
Ukiui: 33
Ilinniartoq
www.dating.gl-imi ilaasortaq

Janusip inuit attaveqarfigerusutani nammineq attaveqarfigisarpai, allanit attaveqarfigineqarnissani utaqqiinnarnagu. Kisiannili assillit kisiisa attaveqarfigisarpai, nammineq pingaartikkamiuk inuit qanoq isikkoqarneri nalunagit allaqatiginissai, aamma inuit ilumoornerannut takussutissaasorigamigit. Taamaakkaluartorli attaveqarfinilu ulluinnarsiutigiinnarlugu attaveqarfigeqatigiittarput.

- Ulluinnarni inuunerput pillugu allaqatigiittarpugut, sulerinerluta, suminngaanneernerlutalu. Suli asanninneq eqqarsaatigalugu soqutigisannik naapitsinngilanga, Janus oqarpoq. Kisianni suli neriuuteqarpoq. Nuannaraami allaqateqarujoorneq.

- Aamma imaassinnaavoq ullut ilaanni uannut tulluartorpiaq saqqummertoq!

Inuunerunngitsumi inuulersinnaaneq

Internetikkut naapeqatigiiffinni profililioraanni kinaassusivik takutittariaqanngilaq. Inuk nammineq sallu atorlugu kinaassusiliorsinnaavoq, taannalu naapertorlugu attaveqarluni.

- Isumaqarpunga inuit taamaaliortut nallinnartuusut. Inuunerat susoqarfiunngissimassaqaaq. Imminnut nalusimassapput, sallunerallu naggataatigut namminermut tussooq. Pakatsinikkut. Interneti inuunermut ilumoortumut taarsiutaanngilaq, pissutigalugu inuit isigisinnaallugit attaveqarneq tunisinerusarpoq. Isikkui takullugit oqaluullugit pissusai qanoq ittuunersut takuneqarsinnaanerusarmata, Janus oqarpoq. Ilanngulluguli oqaatigaa inuit toqqaannartumik inunnut attaveqarnissamut sapersut attaveqaqatigeeriaaseq taamaattoq iluaqutigisinnaammassuk.

Janusip www.dating.gl-imi ilaasortanngoramili inuunera allanngorsimanngilaq. Namminermi oqarneratut nuannariinnarlugu, ilungersuuterujussuarnagulu ilaasortaavoq.

Profilinili suli alakkallattaartarpaa. Imaassinnaavormi ullut arlaanni naapitaqartoq.

All.: Aminnguaq Dahl Petrussen
Ass.: Knud Josefsen

- Takuuk, allaqatinnut kingullermut mobilima normua tunniuttoorakku, sms-erfigigaanganga akinngikkukku, asu sianissooq. Kisianni sianeraangat tiguneq ajorpara, misigisimagama oqaluunnissaanut suli piareersimananga, arnaq33 oqarpoq. Uggualaarpoq mobilimi normua tunniussimagamiuk, tassami allaqatigisaa sukataartorujussuuvoq, tuaviornerpaamillu arnaq33 naapikkusullugu.

arnaq33 sivisujaamik internetimi naapitsiniartarfimmi ilaasortaasimavoq, misilittagaqaleriivissimallunilu. Tassuuna inuit assigiinngitsut naapereersimavai.

Asanninneq
arnaq33 aappaqaranilu meeraqanngilaq. Arnaavoq anginngitsoq nerinnalaartoq. Angerlarsimaffia torerpoq, pequtaalu mutit, amerlanertigullu qaqortunik qalipaatillit paarilluagaarpasipput. - Ukiorpassuit aappaqarnikuullunga qimakkatta, namminerlu initaarama aalajangerpunga pequtikka qaamasuussasut, inuunermik nutaamik aallartitsinermik ersersitsisut, arnaq33 oqaluttuarpoq.

Maanna sivisujaamik dating.gl-imi ilaasortaavoq, nammineq oqarneratut nuannariinnarlugu. Ulluinnarni allaqatigisinnaasaminik, kammassaminik angutaatigisariaqanngisaminik naapitserusuppoq. Taamaattorli allaqatigisani siulleq asannilerfigaa.

- Allagarseqqaarama assut nuannerpoq! Soorlu sorujussuarmik tunisilluni. Taassuma profilera atuarsimariarlugu soqutigigamiuk allaffigaanga. Qaammat ataatsip missaa allaqatigeerujoortarpugut, soqutigisagut, susarnigut, ilaquttagut kammalaatigullu allaaseralugit. Nuannerpoq inuk ilisarisimanngisaq allaqatigiinnarlugu qanilliartuaarlugu, soorlumi nalunngisariinneq itinerusoq, arnaq33 oqaluttuarpoq.

Taamaallutik naapinnissartik isumaqatigiissutigaat. arnaq33 tunuarsimaaqqaaraluarpoq, tassami misigigami killissani qaangerneqalersoq. Imminulli oqarfigaaq qanoq aamma asuliinnarsuaq naapitsiniartarfimmi ilaasortaassalluni, allaqatigisartakkamilu naapinnissaa akueralugu. Ulloq taanna naapittussaallutik assut pissangavoq, sivisuumillu allaqatigisareeramiuk misigaaq inuk ajunngitsoq naapilerlugu.

- Naapikkatta eqitaarujussuarpugut. Oqaluuttorujussuuvugut, malugaaralu killissakka qaangerniaannarlugit naapinniarsimanngikkaanga. Allaqatigiiginnartarallarattali nuannariilerpugut, naapikkattalu nuannariinnerput suli attapparput, asannilerpugullu, arnaq33 oqaluttuarpoq. Siornatigut ilaatigut imerniartarfinni imigassartorsimalluni angutinik naapitsisarsimavoq. Unalu naapinneq immikkut isigaa, imigassartorsimanani, imminullu ilinniaqqaarluni naapinnerummat.

Kammagiinneq
Qaammatit marluk aappareereerlutik paasivaat assigiinngippallaarlutik, qimapput sulili kammagiillutik. arnaq33-p suli profilini alakkartarpaa.

- Allaqateqartarpunga, asuli nuannariinnarlugu allaqatigisartakkannik. Ulluinnarni pisut sukujuit eqqartortarpagut. Aamma kammattaarnikuuvunga naapittakkannik, oqaluuterujoortakkannik. Assut iluarpoq eqqarsaatinik anitsivissaqarluni, nalunagu qaquguluunniit saaffigisinnaallugit, arnaq33 oqarpoq. Taamaakkaluartorli aamma allaqateqartarpoq nuannerpallaanngitsunik. Allattartut ilaat tiinganiakujuinnarlutik allattarput, taakkulu arnaq33-p ilisimatittarpai tamakkuninnga ujartuisuunani. Allaqatitaavalu kingulleq tuaviortorujussuulluni naapitsiniarsarivoq. arnaq33-lli pingaartippaa eqqissillutik ilinniaqqaarlutik naapinnissartik.

Imminut qiviarnarpoq
Internetikkut allaqateqarujoortarneq arnaq33-p pissarsissutigisimaqaa.

- Allat allaffigalugit mianernarpoq. Oqaatsit atukkakka eqqarsaatigineroqqaarlugit anittalerpakka. Tassami nipi aalajangersimasoq atorlugu allakkuma, nipi taanna atorlugu akineqassagama. Aamma imminut paarinerujussuanngornikuuvunga, namminerlu killissara aaliangiisuutittarlugu inuit qaqugu kikkullu naapinnissaannut. Allagarsillunittaaq nuannarineqartutut misiginarpoq imminullu iluarisimaarnarluni, arnaq33 oqarpoq. Isumaqarpoq naaperiaaseq taanna iluatsittumik atorlugu torrattuusoq, kalaalerpassuillu tamanna aqqutigalugu naapittarsinnaasut.

- Kalaalerpassuit imigassaq aqqutigalugu naapittarput, taamaalillutillu aalakoorlutik immaqa ilaatigut kinaassusivitsik takutinnagu naapittarlutik. Allaqatigiilluni inuup kinaassusaa ersertarpoq, malunnartarlunilu inuk qanoq ittuunersoq, arnaq33 oqarpoq. Suli naluaa allaqatigisani kingulleq naapissanerlugu. Sulili isumannaatsinngilaa. Tassami allaqatigisaa maannakkorluinnaq naapitserusuppoq, ”arnaq33”-li utaqqeqqaarusulluni. Immaqa alaannassavaa. Immaqa naamik. Aaqqissuisoqarfiup „arnaq33“-ip kinaassusivia nalunngilaa.

- Ilaasortanngoqqaarama suliartoraangama suliassara siulleq tassa dating.gl-imut iserlunga profilima alakkarnissaa. Tassa taama uerisimatigaanga, ”arnaq33” oqarpoq.

All.: Aminnguaq Dahl Petrussen

ilaasortaaniaraanni siunnersuutit qulit:

  1. Imminut ilumoorfigigit
  2. Attaveqarfigisat ilumoorfigiuk
  3. Eqqaamajuk, internetimi inuuneq inuunivimmut taarsiunneqarsinnaanngimmat
  4. Misilikkaanni aatsaat paasineqarsinnaavoq
  5. Attaveqarfigisat naapikkusukkukku ilinniaqqaarlugu naapiuk
  6. Tiinganiakujuinnarlutit ilaasortanngornianngikkuit tamanna erseqqissaruk. Tiinganiakujuinnarlutimmi ilaasortaasut amerlammata
  7. Iluamik pineqarusukkuit, allat iluamik pikkit
  8. Allat isikkui, qanoq issusaalu isornartorsiorniarukkit, imminut qiviaqqaarit
  9. Aappaqaruit, aappat nassuiaaguk sooq ilaasortaanerlutit, paatsooqatigiinnissaq peqqunagu
  10. Ilungersuuterujussuanngikkaluarlugu ilaasortaagit!

Siunnersuutit uku uani aviisimi apersukkat siunnersuutigaat

Lona Lynge
peertussaajunnaarluni saqqummerpoq

Kinaassutsit nammineq aalajangersinnaavat. Kinaassusiviit saqqummiussinnaavat, imaluunniit sallullutit kinaassuseqartuusaarsinnaavutit. Isikkut takutinngikkaluarlugu kammattaarsinnavutit. Namminerlu aalajangissavat kammattaat attaveqarfigiinnassanerlugu, imaluunniit alaannassanerlugu.

Lona Lynge, Ilisimatusarfimmi Oqaasilerinermut, atuakkialerinermut, tusagassiuutilerinermullu ilinniartuuvoq, maannalu inaarutaasumik misilitsissutissani suliaralugu. Taanna taaguuteqarpoq; nye kommunikations- OG samværsformer – attaveqaqatigeeriaatsit nutaat katerisimaariaatsillu. Tassanilu sammivai internetikkut naapeqatigeeriaatsit.

Sianissuseq oqaatsillu atorlugit
Lona Lyngep ilisimatusarnermini paasivaa attaveqatigeeriaaseq internetikkut ingerlanneqartoq, sianissuseq oqaatsillu annerpaamik sakkugalugit ingerlanneqartartoq. Tassani toqqammavigai chat-erluni, date-rniarlunilu attaveqaqatigeeriaatsit.

- Inuit taamaalillutik naapeqqaartut imminnut ilisarisimaneq ajorput. Oqaatsit sianissuserlu sakkugalugit attaveqatigiittarput. Ima paasillugu, illarnarisat, soqqusaassinnaaneq assigisaallu toqqaannarnerusumik saqqummertarput, inuit imminnut isiginatik attaveqaqatigiinnerisa kinguneranik, Lona Lynge oqarpoq.

Oqaatsit sianissuserlu aallaavigalugit naapinnermi inuup kinaassusivia aallaqqaammut takuneqarsinnaasanngilaq. Kisiannili allaqatigiillattaalernermi, inuk qanorluunniit kiffaanngissuseqarluni allassinnaasarpoq. Taamaalillunilu takuneqarsinnaajartuaartarpoq inuk qanoq pissuseqarnersoq, soorlu imminut tatiginersoq imaluunniit naamik.

Attaveqaqatigeeriaatsimi taamaattumi inuup namminiivilluni aaliangertarpaa allaqatigisani allaqatigiinnassanerlugu, imaluunniit ”alaannassanerlugu”.

- Tassami suli takunnginnermi alarsineq nalunannginnerujussuusarpoq. Soqutiginngisat allaqatigiunnaaginnarsinnaavat, kamaannermik kinguneqanngikkaluartumik. Taava taamaalilluni attaveqaqatigiinneq ”toquinnassooq”. Kisianni aamma imaassinnaavoq tarneqatinnik naapitsisutit, attaveqaqatigiinnersilu annertunerulersinnaavoq, allaat ”inuunivimmi” naapillusi, Lona Lynge oqarpoq.

Kinaassuseq inooriaaserlu nutaaq
Internetikkut, tassa chat-ikkut date-rtarfitsigullu naapinnermi inuup nammineq qanoq ”kiinnissanerluni” aalajangertarpaa. Kisimiilluni qarasaasiap saavani inunnut allanut attaveqarniarnermini kinaassutsini ilumoortoq, imaluunnit kinaassuserisuusaakkani saqqummersissinnaavaa.

Ukioq 2002-mi Kalaallit Nunaanni inoqutigiit 13%-ii internetimut attaveqarput.

- Taamatut attaveqarniaruit atit kinaassutsillu saqqummiuttariaqanngilatit. Nutaamik kinaassusiliorsinnaavutit; assersuutigalugu inuttut ajunngequtitit kisiisa, sallumik ilallugit saqqummiussinnaavatit. Ajoqutitillu, illit qanoq ittuussutsinni nuannarinngisatit minillugit. Taamaalillutit illit qanoq ittoorusussutsitit kisimik saqqummissapput, kinaassusiviillu saqqummernani. Kinaassuserisuusaakkat atorlugu inooriaatsimik nutaamik, interneti aqqutigalugu pilersitsisinnaavutit, inooriaaseqalerlutit sallu toqqammavigalugu. Assersuutigalugu, ulloq naallugu qarasaasiap saavani inuusinnaavutit inunnut attaveqarnissamut pisariaqartitatit naammassillugit, Lona Lynge oqarpoq.

Tamannali siunissaq ungasinnerusoq eqqarsaatigalugu ataavartuunnginnerarpaa. Tassami ilumoorullugu inunnik nalunngisartaarniaraanni, kingornalu naapinnissaq eqqarsaatigalugu, imminut allaqatigisarlu ilumoorfigigaanni, tassa sallu tunngaviginagu kinaassuseq saqqummiukkaanni imminut allaqatigisamullu kingunerinnerusinnaammat. Taamaalilluni imminut allaqatillu pakatsisinnginnissaat pineqarsinnaammat.

- Taamaammat sallu atorlugu kinaassuseqartuusaarniaraanni pitsaanerussaaq, imminut qiviaqqaaraanni, sunalu anguniarnerlugu paaseqqaaraanni, pakatsisitsinnginnissaq pillugu. Kinaassuseqartuusaarnermi imminut salloqittarneruvoq, Lona oqarpoq.

Imminut qiviarneq
Taassumattaaq oqaatigaa internetikkut attaveqaqatigeeriaaseq imminut paasiartuaartitsinerusinnaasoq. Inuk imminut ilisaritittaqattaarnermini kinaassutsini qiviariartuaarsinnaasarpaa, assersuutigalugu atoqatigiinnermi nuannarisani, sexualitiitini, paasiartuaarsinnaallugit.

- Inummik allaqatiginninnermi imminut qiviarneq pisarpoq. Assersuutigalugu inuk imminut tatiginngitsoq imaassinnaavoq imminut tatiginnginnini nuannarinnginnamiuk, imminut ilisaritinnermini ilanngutinngikkaa. Taamaalillunilu nammineq paasillugu, ‘hov, imminununa tatiginnginnama taamaannera qiviarusunngikkiga’. Aamma taamatut attaveqatigeeriaaseq inuup nammineq nuannarinngisaminik, sanngiiffimminillu takunniffigisimaguniuk, imminut katsorsarnertut atorsinnaavaa. Inuit ilisarisimanngilluinnakkani ajornartorsiutiminik oqaloqatigisinnaavai, iluaallaatigisaminik. Uffa immaqa isigalugit oqaloqatigigunigit tamanna pinavianngikkaluartoq, Lona Lynge oqarpoq. Naqissuserpaattaaq inuit ulluinnarni inoqatiminnut arlaannik pissuteqarlutik attaveqanngitsut, attaveqaqatigiinnermut pisariaqartitaminnik pissarsivigisinnaagaat.

- Maanna killiffigaarput nunarsuaq tamakkerlugu inuit nunarsuarmioqataasutut misiginerulernerat. Piffissaq apeqqutaajunnaarpoq, suallakkutta piffimmut allamut pisinnaalerpugut, timerput nikinngikkaluarluni. Kikkulluunniit qarasaasiallit internetimullu attavillit tamanna ilaaffigisinnaavaat. Inuillu periuseq ‘nalinginnaasoq’ atorlugu naapittussaanngikkaluartut naapittalerput, Lona Lynge oqarpoq.

Atugaajuaannassooq – massakkornit annertunerusumik
Internetikkut attaveqatigiittarneq nunatsinni aamma atugaasorujussuuvoq. Lona Lynge oqarpoq atugaaleqqaarami paquminakujuttooriarluni, maanna nalinginnaaleraluttuinnartoq. Nunatsinni suli nutaajuvoq, taamaakkaluartorli atugaasorujussuulluni. Inuit kammassarsiortarput, amerlasuutigut assitik ilannguttarlugit. Nunani siuarsimasuni taamatut naapinneq, naapeqatigiinnissamut periarfissatut isigineqalernikuuvoq, paquminarunnaarluni.

- Aamma ilimagaara nunatsinni taamasissasoq. Naapeqatigiinnissamut periarfissaannartut ilernissaa ilimagaara. Kalaallit nunatsinni taamaasereerpoq. Inuit kinaassusaannut ajoqutaanavianngilaq, imminut qiviarnerugami. Date-rtarfinni ilaasortaasut allallutik, oqaasissaminnik eqqarsaqqaarlutik imminnut ilisaritittarput, tamannalu oqaluinnarnermiit kimittunerusinnaasarpoq, kinaassutsimullu iluaqutaaginnarsinnaalluni. Nalinginnaasunngussooq, inuit orniginartitaat, Lona Lynge naggasiivoq.

All.: Aminnguaq Dahl Petrussen
Ass.: Knud Josefsen