ARNANUT-nit arnat pingasut nujalerisumukartippagut nujai allanngortilaarniarlugit. Aamma kosmetolog Marina Vejlø-mukartippagut ulluinnarni kiinnaminnik tanittarnerinik pikkorissartilaarlugit, naggataatigullu atisaarniarfinni nutaanik atisassarsiniartillugit. Iluatsitsilluarpullu.

Arnat taakku pingasut assigiissuseqarput, tassami tamarmik perorsaasutut suliffeqarput tamarmillu takisuunik nujaqarput naatsunillu kipitikkusunngillat. Nutsalli naalisarpallaanngikkaluarlugit tamatigut tamaanalu misutsilaarlugit allannguallaataalluarsinnaavoq.

Birthe Burkahl

Birthe BurkahlKINAASSUSIA
Atia : Birthe Buhrkal
Ukiui: 28
Aappaqarnera: Ueqarpoq pingasunillu meeraqarluni, angajullleq arfineq pingasunik tullialu sisamanik ukioqarput nukarlerlu qulinik qaammateqarluni.

Birthe Buhrkal allanngortinneqarnini pillugu:
– Naammagisimaarluinnarpara, nutsakkalu oqiliallaqaat. Qanga kingullermik nujalerisumiissimanera eqqaamanngilara, uimami kipisaraminga. ujalerisumeereersunga takugaminga qungujuppoq, Birthe Buhrkal oqarpoq. Meeraqqeriffimmi suleqatasa takugamikku tupigutsaqaat kusaginermik.
– Takugaminnga ersaattaattuinnaapput allanngornera kusagalugu.
Suligaangamali tasiuasoqartarpunga iluarnerummat, Birthe Buhrkal meeraaqqerivimmi sulisoq oqarpoq.

Nujalerisoq Puk Zakariasen, Salon Puk:
– Birthep nujai torsoqigamik oqimaapput, kiinaalu ersarinnerulersinniarlugu takeqatigiisinnagit tukattumik killulaarpakka. Qalipaatillu sakkortuut atorlugit nujaasa ilai misuppakka oqippasinnerulersillugugit kiinaalu ersarinnerulersillugu.

Kosmetolog Marina Vejlø taninneqarnera pillugu:
Siullermik foundation atorpara, kingornalu panernersai isaasalu atai taarpallaartut concealerimik annikitsumik qallerpakka. Taava uisorersaatai qallui tikillugit qalipaasilaarpakka. Aqerluusaq qernertoq eyeliner atornagu qalipaasiuteeraq masatsilaariarlugu isit eqqaannut qalipaammut misulaariarlugu isaasa eqqai tanippakka, aqerluusatut ersaritsiginngitsumik kisianni isaanik ersarissisitsisumik. Taava qimeriai peqeriarlugit imermik pitarneqarsinnaanngitsumik mascaralerpakka. Naggataatigullu qarlui lipglossilimmik liiperpakka.

Bikki K. Jepsen

Bikki K. JepsenKINAASSUSIA
Atia: Bikki K. Jepsen
Ukiui: 42
Aappaqarnera: Ueqarpoq marlunnillu meeraqarluni 14-inik aamma 11-nik ukiulinnik.

Bikki K. Jepsen allanngornini pillugu:
– Nutsakka assut nuannaraakka, immannguaannaq kipitikkaluarlunga oqiliallaqaat. Kingullermik nujalerisumiippunga ukiut qulit matuma siornatigut. Misunneqarneri nuannaraakka. Uima meeqqamalu nujalerisumiinnissara assut pissangagikammikku allanngornera kusageqaat. Aamma allatut ajornaqaaq isaruartaartariaqarpunga, Bikki K. Jepsen oqarpoq.

Nujalerisoq Naja Lange, Salon Nutsat:
– Takeqatigiinngitsunik killorpara nujai tunngavallaaqquunagit. Nujai qaamanerusunngorteqqaarpakka, kanngussammullu assingusumik qalipaatilimmik misullugit. Naggataatigut Bikki perlakkanik nujaasalerpara amianut ikkutivillugit, tassa taamaattut extensions-inik tuluttut taasagaat atorlugit nutsat takinerusunngortinneqarsinnaapput. Naatsunilluunnit nujallit arlaanni festeriarnialerunik »takisuunik« nujartaarsinnaapput, Naja Lange oqarpoq.

Marina Vejlø taninneqarnera pillugu:
- Bikki amerippoq sinngorluni milaaraqarlunilu. Annikitsuinnarmik Foundationilerpara, taava puddit oqitsuaqqat amermut milluguttartut atorpakka. Inunnguutsiminik isikkua allanngortittariaqanngimmat. Qaavatigut nalinginnarnik puddeqqinneqalaarsinnaavoq foundationi sivisuumik atasinnaaniassammat amialu qillertinnginniassammat. Taava isaasa eqqai qaamasumik tanippakka sinaalu tamakkernagit eyeliner 3/4 atorlugu titarlugit. Taamasillugit isai »ammarnerulerput« Naggataatigut lipglossimik liiperpara. Siunnersuut: Ulluinnarni lipgloss atortaruk qarlutit kusanartut ersarinneruniassapput.

FlaviâraK Petrussen

FlaviâraK Petrussen
KINAASSUSIA
Atia: FlaviâraK Petrussen
Ukiui: 42
Aappaqarnera: Ueqarpoq 4-nik meeraqarluni imatut ukiulinnik: 22, 13, 12 aamma 10.
Qanittukkut Kangaamiuni ernutartaarpoq, namminermi aamma Kangaamiuneersuuvoq.

FlaviâraK Petrussen allanngornini pillugu:
– Inuuleramali aatsaat nujalerisumiippunga. Siornatigummi ikinngutinnut kipititarpunga. Nujartaakka nuannareqaakka immaqami ilaanni nujalerisumukartalissaanga. Assut isumassarsinarpoq. Uima aamma assut iluaraa, allamimmi oqannginngilaq: Qangali nujalerisumukarsimassagaluaravit. Suleqatima ataatsip allaasorigaluarpaanga, illaleramalu aatsaat ilisaralunga. Taama misiliineq misigisaavoq nuannersoq, FlaviâraK Petrussen oqarpoq.

Nujalerisoq Erena Heilmann, Salon 67:
– Nujai takeqatigiinngitsunik kipivakka tunngavallaarunnaarniassammata tasisuasorlu atorunnaarlugu nutsani isunngatittalerniassammagit. Taava nujaasa ilai misuppakka uumasuseqarpalaarnerulersillugit. Nutsani skummileriarlugit panersiummik panersiinnartassavai, tassa kusanat, Erena Heilmann oqarpoq.

Marina Vejlø taninneqarnera pillugu:
– Flaviâqqap amia salilluarneqartariaqarmat taamaasioqqaarpunga uummaallatsillugu. Amiatalu ilaa panerpallaartoq amermut panertumut naleqquttumik tarnguteqartariaqarpoq. Taava foundationilerpara kingorna puddelaarlugu tarngutaa sivisunerusumik ataniassammat. Uluaasa saarngi kusanartut erseqqinnerulerniassammata isugutattumik sinngorsaaserpara. Saarngi qaavatigut ataatungaatiguunngitsoq sinngorsaaserlugit kusanarnerusarput. Isaasa eqqai qaamasumik qalipaaserpakka aamma qalluisa ataasigut. Taamaasillutik uisorersaatiminiarai qaffarnerusutut ipput. Qimeriai imermik pitarneqarsinnaanngitsumik mascaralerpakka isai kusanartut suli ersarinnerulersillugit. Naggataatigut lipglossimik liiperpara.
Siunnersuut: Tarngut isugutannartulik pitsak atortassavat.

All. Inga Dóra Gudmundsdóttir Markussen
Ass. Knud Josefsen